तुझ्यासारख्या लबाडाचे मी गोडवे गात नाही...

तुझ्यासारख्या लबाडाचे...

मी कशाला मित्रा तुला उगाच डंख मारू,
माझी विंचवाची जात नाही 
तुझ्यासारख्या लबाडाचे, मी गोडवे गात नाही 

किती बेगडी चेहरा आहे, तुझा गड्यारे
मुखात मात्र कधी तुझ्यारे, खरी बात नाही

हप्ता घेण्याची तुझी ती, मी रीत वेगळी पाहिली 
अन् तू खुशाल म्हणतो आपला, भ्रष्टाचारात हात नाही 

अरे काल का ? तू शपथ घातली, गळ्यातल्या माळेची 
आज म्हणतो ढाब्यावरचे चालते मजला, मी घरी खात नाही 

तू रम, रमा, रम्मीने, लुटलास पुरता परंतु
पिकातल्या ओढाळ ढोरापरी, तुझी खोड जात नाही.

याला त्याला थापा मारणे, हा रोजचा धंदा तुझा
तूच तुझे का बूड बडवितो, जी तुझी अवकात नाही

डॉ.धोंडोपंत मानवतकर